Programa Deporte Solidario

En que consiste

A Fundación Emalcsa mantén desde 2013 unha liña de intervención destinada ao fomento do uso do deporte como instrumento social. Para iso busca a colaboración de asociacións sen ánimo de lucro de A Coruña que promoven a actividade física e o deporte, máis alá dos beneficios da aprendizaxe e práctica deportiva en si mesmos.

O obxectivo é ofrecer oportunidades únicas para a promoción e transmisión de valores, para a integración e a cohesión social e favorecer o uso do deporte como instrumento de intervención e transformación social.

Esta iniciativa canalizase a través dunha convocatoria pública, en réxime de concorrencia competitiva, de forma anual, á que se poden presentar entidades sen ánimo de lucro de A Coruña. Os proxectos deben contribuír ao desenvolvemento dun fin social a través do deporte: contribuír á igualdade de oportunidades e a inclusión social de persoas en risco de exclusión social ou pobreza, ou en situación de vulnerabilidade social, con especial atención á infancia, xuventude, persoas con discapacidade e ás minorías étnicas, mediante o fomento da súa participación na actividade deportiva.

Os proxectos financiados pola Fundación Emalcsa parten dun diagnóstico sobre a realidade social e inciden sobre a problemática identificada desenvolvendo accións que contribúan a afrontala a través da actividade deportiva. As entidades beneficiarias están obrigadas a incluír na súa comunicación pública a imaxe de Fundación Emalcsa.