O Concello da Coruña, a través da Fundación Emalcsa, asinou esta mañá os convenios de colaboración coas entidades seleccionadas na X convocatoria de ‘Deporte Solidario e Inclusivo’ e na VIII convocatoria de ‘Cultura Accesible e Inclusiva’. Estes dous programas están impulsados polo Concello da Coruña en colaboración con Gadisa, no caso da convocatoria de deporte, e de Vegalsa e a Fundación María José Jove, no de cultura.
O acto estivo presidido pola presidenta da Fundación Emalcsa e alcaldesa da Coruña, Inés Rey, acompañada pola vicepresidenta da Fundación Emalcsa e concelleira de Benestar Social, Yoya Neira, así como por representantes das entidades beneficiarias e dos patrocinadores de ambos os programas.
Durante a súa intervención, Inés Rey puxo en valor os programas ‘Deporte Solidario e Inclusivo’ e ‘Cultura Accesible e Inclusiva’ como unha alianza entre as entidades públicas e privadas, e reafirmou o compromiso do concello coruñés ‘coa comunidade deportiva e cultural da cidade, proporcionando os recursos necesarios para a continuidade do seu labor social’. Ademais, destacou a contribución de Gadisa, Vegalsa e a Fundación María José Jove como ‘un claro exemplo da importancia da colaboración entre entidades para impulsar proxectos como os que se seleccionaron nesta edición’, continuou Rey.
X Convocatoria Deporte Solidario e Inclusivo
Desde a súa primeira edición, o programa ‘Deporte Solidario e Inclusivo’ destinou axudas para a promoción da igualdade de oportunidades, a integración social e o fomento de hábitos de vida saudables a través do deporte.
A décima convocatoria do programa conta cun orzamento de 250.000 euros para financiar proxectos enfocados na integración de colectivos vulnerables a través do deporte. E é que, desde a creación deste programa de axudas en 2013, o concello da Coruña, a través de Fundación Emalcsa, destinou máis de 2 millóns de euros a ‘Deporte Solidario e Inclusivo’, e contou con Gadisa como patrocinador do programa desde 2017.
Os proxectos do programa ‘Deporte Solidario e Inclusivo’ impactarán de maneira directa en máis de 5.000 persoas, segundo previsións das entidades participantes, que participarán durante os próximos meses nas actividades deportivas programadas. Ademais, gran parte dos proxectos seleccionados incorporan unha oferta de prazas de carácter gratuíto nas súas actividades destinadas, principalmente, a menores en risco de exclusión social. Estas prazas estarán xestionadas polos Servizos Sociais Municipais e, nesta edición do programa, serán un total de 600.
As 20 entidades subvencionadas na X convocatoria do programa ‘Deporte Solidario e Inclusivo’ son: Club Escola de Tenis Marineda, Real Sociedade Hípica da Coruña, Agrupación Montañeiros Independentes (AMI), Zalaeta 100Tolos, Club de Pelota A Coruña, Orillamar SD, Club Halterofilia Coruña, Athletic Coruña Hóckey Club, Club Torre SD, Club Esgrima Coruña, Club Tríatlon Coruña, Club Viaxes Amarelle FS, Club de Natación Coruña, Club de Rugby Arquitectura Técnica, Unión Veciñal Ventorrillo, Victoria CF, Sporting Club Casino da Coruña, Eirís SD, 5 Coruña Fútbol sala e Real Club Náutico da Coruña.
VIII Convocatoria Cultura Accesible e Inclusiva
A través do programa ‘Cultura Accesible e Inclusiva’, Fundación Emalcsa destinou desde 2016 máis de 750.000 euros para financiar proxectos de integración social a través da cultura, coa contribución, desde a súa primeira edición, da Fundación María José Jove e Vegalsa.
Todas as iniciativas comparten a vocación de traballar pola inclusión de colectivos discriminados socialmente por motivo de discapacidade ou baixos recursos económicos, ofrecéndolles espazos culturais seguros e os medios necesarios para mellorar o seu benestar e desenvolvemento persoal.
As entidades seleccionadas nesta oitava convocatoria poñerán en marcha un total de 15 proxectos sociais dos que se beneficiarán máis de 1.200 persoas e máis de 30 entidades sociais e que terán como obxectivo principal o impulso da cultura como instrumento transformador.
As 15 entidades ás que se concedeu as axudas da VIII convocatoria do programa ‘Cultura Accesible e Inclusiva’ son: eSe8, Asociación Participa para a Inclusión Social, Amigos de Museo de Belas Artes da Coruña, A.C. Alabatros, Asociación Xuvenil Atlántica, Asociación Cultural Aïs, Asociación Socio-Cultural Acampa (ACAMPA), Asociación Cultural Noite Bohemia, Asociación Ponten100mos, Asociación Cultural Tres por Catro, Viraventos, Atempo, Asociación Cultural Coruñesa Negus, Sociedade Filatélica da Coruña e Asociación Cultural para a Integración Social Diversos.